SDG 2030 erseqqissaasutit
Nunatta ingerlariaqqinnissamut suliniutai, unamminartoqarfii periarfissaalu siunissami atuutilernissaanut Inuiaat peqatigiit siunniussaat ukiumut 2030-mut
Ingerlaneq suliarinninnerlu
2021-mi ukiukkut ataatsimiinnermi Nunarsuatta Piujuaannartitsisumik ineriartornissaanut nalunaarusiaq Inatsisartunut agguaanneqarpoq. Nalunaarusiaq Kalaallit Nunaata FN-ip nunarsuarmioqatigiinnut anguniagassarititaanut tunngasunut isumaqarnera, immaqalu tamakku qanoq atuutilersinnissaat pillugit Inatsisartuni apeqquteqaat aallaavigalugu oqallinnermit aallaaveqarpoq (EM2017/120). Naalakkersuisut nunatsinni suliniutinut, ilungersunarsinnaasunut piujuartitsinermillu ineriartortitsinissami periarfissanut kiisalu siunissami nunarsuarmioqatigiit anguniagaannik atuutilersitsinissamut nalunaarusiortarnissamullu suliniutinik nalunaarusiorput. Nalunaarusiaq suliniutaareersut qissiminnerisigut Kalaallit Nunaata FN-ip nunarsuarmioqatigiinnut anguniagassarititaanut tunngatillugu qanoq inissisimaneranik ersersitsivoq. Suliniutaareersut aallaavigalugit kaammattuutit arlallit malitseqartitsivigineqarsinnaasut ersersinneqarput.
Oqariartuutit kaammattuutillu
Nalunaarusiami pingaarnertut nunarsuarmi anguniagassiissutit assigiinngitsumik annertussusilimmik nunatsinni suliniutaareersunut attuumasut ersersinneqarput. Taamaattoq periusissatigut ingerlatsinikkullu suliniutit ataqatigiissarnerisa annertusarnissaat pisariaqartinneqarpoq, tassanilu nunarsuarmioqatigiinnut anguniagassarititat tassannga pilersitsinermut ilapittuisinnaallutik. Naatsumik oqaatigalugu nunarsuarmioqatigiinnut anguniagassarititat paasinninnermut tunngavimmik nutaamik, suleqatigiinnernik peqatigiinnernillu nutaanik pilersitsisinnaasunik, maannalu siunissamilu ajornartorsiutinik periarfissanillu nunatta nalaataanik imaqarput.
Piujuartitsinermut tunngasunik suliniutit atulersinneqarnerannut anguniagassiissutillu atulersinneqarnerat aallaavittut akisussaallutik naalakkersuisoqarfinniippoq. Qitiusumilli ataqatigiissaarisoqassasoq kaammattuutigineqarluni, imatut ilaatigut:
1) nunarsuarmi anguniakkat aamma pisortatigoortumik kalaallisut assit aamma nunarsuarmi anguniakkat nutserneqarnerisa ingerlateqqinneri
2) aaqqissuussinerit aamma nunami pisunik assigiinngitsunik ingerlatitseqqinnerit
3) kisitsisitigut paasissutissatigut siumukartoqarneranik takutitsinerit qulakkeerneqarneri
4) nunarsuarmiut anguniagaat il.il. pillugit ilinniarnermi atortussaliorneq
Tamanna tunngavigalugu Naalakkersuisut nunarsuarmioqatigiinnut anguniagassiissutit atuutilersinneqarnerannut ataqatigiissumik periusissiornikkut nalunaarusiaq Naalakkersuisut malitseqartitsivigissagaat kaammattuutigineqarpoq. Naalakkersuisoqarfiit ingerlatsiviillu akimorlugit periusissiaq taamaattoq siunissami sulinissamut pingaarnertut sinaakkutinik tunngavissanillu, Kalaallit Nunaanni piujuartitsisumik ineriartortitsinermik qulanaarsillunilu ikorfartuisussamik aalajangersaanissamik siunertaqarpoq.