Kalaallit inuusuttut 42-t UNLEASH Greenlandimut peqataasut

UNLEASH Regional Innovation Lab Greenland 2022 aggustusip ulluisa 20-anit 26-anut siullerpaamik ingerlanneqarmat kalaallit piginnaanillit 42-t inuusuttut Issittumeersut aamma Nunanit Avannarlerneersut katillugit 200-t peqatigalugit Nuummi katersuupput.

Saqqummiunneqarpoq September 14, 2022

UNLEASH tassaavoq iluanaarniutiginagu suliniaqatigiiffik inuusuttunik nunarsuaq tamarmeersunik NP-imi piujuartitsisumik ineriartortitsinissamut Nunarsuaq tamakkerlugu anguniakkanik isumassarsianik avitseqateqartussanngorlugit ineriartortitseqataasussanngorlugillu suliaqartoq. Taamatut nunap immikkoortuani nutaaliorluni pilersaarusiornermi isumassarsiat katersuuffigineqarnissaat, attaveqaatinik piorsaanissaq aamma Kalaallit Nunaannut, Issittumut Nunanullu Avannarlernut attuumassuteqartunik piujuartitsisunik aaqqiissutissanik pilersitsinissaq siunertarineqarpoq.

Nunarsuarmi anguniagassani siunnerfiit pingasut aallaavigalugit Peqqissuseq (SDG 3) Ilinniartitaaneq (SDG 4), Uumassusillit assigiinngisitaarnerat aamma sila pillugu iliuutsit (SDG 13, 14 aamma 15) peqataasut suleqatigiinnut 37-nut agguarlutik nutaaliornerni aaqqiissutissanik suliaqarput.

Kalaallit inuusuttut piginnaanilippassuit nunarsuarmi tamarmi anguniagassani unamminartuni ilippanartunilu ullutsinni kalaallit sammivii aallaavigalugit tunniussaqarluarput aamma peqatigiillutik aaqqiissutissat kalaallinut inuiaqatigiinnut attuumassuteqartut tunngavissinneqarnissaannik qulakkeerinneqataapput.

Sakkortuumik nutaaliorluni suliaqarnerit, oqaaseqaasiornerit aamma namminersorlutik inuussutissarsiuteqartunit, kommuninit aamma Namminersorlutik Oqartussanit soqutigisaqaqatigiinnik paarlaasseqatigiinnerit saniatigut peqataasut tamarmik nerisassatigut, nipilersukkatigut takutitsinertigullu kalaallit kulturiannik misigisaqarnissaminnut aamma periarfissaqarsimapput.