Kalaallit Nunaata siunissaa pillugu Facebook-imi oqallitsitsineq
Aningaasaqarnermut Naalakkersuisoqarfimmi Tunngaviusumik Inatsimmut Immikkoortumit Facebookimi qupperneranut nutaami tunngaviusumik inatsimmut nutaamut suliat pillugit aamma pituttorsimaffigisatsinnik katersuuffigisatsinnillu tamanik oqallitsitsineq qulakkeerusuppaa.
Facebookimi qupperneq nutaaq 21. juuni 2020-mi ammarneqarsimavoq aamma maannakkuugallartoq ateqarluni Kalaallit Nunaata siunissaa/ Grønlands fremtid. Aningaasaqarnermut Naalakkersuisoq malillugu anguniagaavoq digitaalikkut ataatsimut eqqaamasanik oqaluttuarerusutatsinnik, pituttorsimaffigeqatigiissutsitsinnik pilersitsiffiusinnaasoq – aamma kinaagaluaruttaluunniit, suminngaanneeraluaruttaluunniit, aamma inuunitsinni sunilluunniit kissaateqaraluarutta katersuuffigisatsinnik.
”Assigiinngitsorujussuugaluarluta taamaattoq sorpassuit ataatsimoorutigaavut. Avannaamiuugaluarutta, kujataamiuugaluarutta, inuusuttuugaluarutta utoqqaagaluaruttaluunniit, nunaqarfimmi illoqarfimmiluunniit peroriartorsimagaluartutta nunatsinniluunniit peroriartorsimagaluarutta nunani allaneersuuguttaluunniit, taamaattoq ataatsimoorfigisatsinnik misigisaqarlutalu pingaartorsiorfeqarpugut. Taakku tassaasinnaapput nerisassioriaatsivut, juunip 21-anni inuiattut ullorsiortarnerput, meeqqat atualeqqaarfii, ullukinnersiornerit, kaffillernerit, aalisariarnerit piniariarnerillu”, Vittus Qujaukitsoq, Aningaasaqarnermut Naalakkersuisoq nassuiaavoq, imalu nangippoq:
”Ataatsimoorluta tamatta Tunngaviusumik Inatsisissatsinnik sulinitsinni, Kalaallillu Nunaata namminersorluni aqutsisoqartup tungaanut suliniarnitta nalaani inuiattut sunik katersuuffeqarnitta paasinissaa pingaaruteqarluinnartuuvoq”. ”Taamaammat sammisanik sunilluunniit katersuuffigisatsinnik misigisanik oqaluttuanik ilapittuuteqarnissarsi tamassinnut kaammattuutigerusuppara”, Vittus Qujaukitsoq qiimmassimaaqaluni naasuiaavoq.
Sammisat siuliani nassuiarneqartutullu issapput, sammisallu allat, soorlu nunasiaasimanerput kiisalu taassuma nassatai pitsaasut pitsaanngitsullu, inuppassuarnik atuuffimminni nunatta kulturikkut, oqaatsitigut politikikkullu ineriartornerani sunniuteqarsimasunik oqaluttuat – kiisalu Tunngaviusumik Inatsit namminerlu naalakkersuisoqarneq pillugu inuinnaat apeqqutaat aallaavigalugit isummat assigiinngitsut qulaajaaviginissaat aamma ilaassapput.
Quppernermi allaaserisat, videot, titartakkat paasissutissiisut assilissallu atorneqassapput. Naalakkersuisoqarfiup akuttunngitsunik oqaluttuanik ikkussisarnissaa anguniagaavoq.
Immikkoortortaqarfimmi pisortaq Natuk Lund Olsen (Aningaasaqarnermut Naalakkersuisoqarfik) uani e-mail: nlol@nanoq.gl
Saqqummiussassanik ataqatigiissaarisoq Martin Christiansen (Aningaasaqarnermut Naalakkersuisoqarfik) uani e-mail: mchr@nanoq.gl